یەک شەممە, 15 ئەیلول 2019 09:35

ڕاسپاردەکانی بارودۆخی مافی مرۆڤ لە عیراقدا بەپێی ڕاوێژی کۆمەڵگەی مەدەنی و وڵاتە ئەندامەکانی نەتەوە یەکگرتووەکان پێش دەرچوونی پێداچوونەوەی خولیی گشتگیر گرنگ

نووسراوە لەلایەن: 

بەغدا، ١١ی ئەیلولی ٢٠١٩ – ئەمڕۆ ڕێکخراوەکانی کۆمەڵگەی مەدەنی عیراقی دەرفەتی ئەوەیان هەبوو کە بەشێوەیەکی ڕاستەوخۆ کار لەگەڵ وڵاتە ئەندامەکانی نەتەوە یەکگرتووەکان لە عیراقدا بکەن لە گفتوگۆیەکی بە پێز لە بەغدا وەک ئامادەکارییەک بۆ ڕاپۆرتی پێداچوونەوەی خولیی گشتگیر دەربارەی بارودۆخی مافی مرۆڤ لە عیراق کە لە کۆتایی ئەمساڵدا دەردەچێت.

بیست و شەش نوێنەری کۆمەڵگەی مەدەنی لە هەموو پارێزگاکانی عیراق وتەی خۆیان پێشکەش کرد و بەشدارییان لە دانیشتنێکی پرسیار و وەڵام کرد دەربارەی ئاستی مافی مرۆڤ لە وڵاتەکەدا لەگەڵ نوێنەرانی ١٢ وڵاتی ئەندامی نەتەوە یەکگرتووەکان و بەشداربووانی یەکێتی ئەوڕوپا و ناتۆ و ژمارەیەک لە ڕێکخراوی نێودەوڵەتی. ڕێکخراوەکانی کۆمەڵگەی مەدەنی چەند پێشنیازێکیان خستە بەردەم بۆ زیاتر پاراستنی مافی مرۆڤی کەمینەکان و ئافرەتان و دەستبەسەرکراوان و هەڵپەساردنی سزای لەسێدارەدان و هەموارکردنەوەی مادەی ٤١ لە یاسای سزادانی عیراقی بە گوێرەی ستاندەرەکانی مافی مرۆڤ و دروستکردنی شێڵتەر لە هەموو پارێزگاکاندا بۆ ئەو کەسانەی لە مەترسیدان.

گفتوگۆکان بە هاوبەشی لەنێوان ڕێکخراوی فرێدریک-ئێبرت-ستیفتونگ و نێردەی نەتەوە یەکگرتووەکان بۆ هاریکاری عیراق (یونامی) ڕێکخرابوون بە مەبەستی یارمەتیدانی وڵاتانی ئەندام لە نەتەوە یەکگرتووەکان بۆ خستنەڕووی ڕاسپاردەی تایبەت و ئامانجدار لە پێش دانیشتنی گروپی کاری پێداچوونەوەی خولیی گشتگیری نەتەوە یەکگرتووەکان کە لە مانگی تشرینی دووەمی ئەمساڵ ئەنجام دەدرێت.

بەڕێز تیم پێتشولات، بەرپرسی ڕێکخراوی فرێدریک-ئێبرت-ستیفتونگ، جەختی لەسەر ئەو "ڕۆڵە گرنگە"ی کۆمەڵگەی مەدەنی عیراقی و وڵاتانی ئەندام کردەوە کە دەتوانن بیبینن لە پێداچوونەوەی خولیی گشگیر. سەرپەرشتیاری کۆبوونەوەکە، د. هێرتا دوبلەرگمێلن، پرۆفیسۆری یاسای نێودەوڵەتی و وەزیری دادی پێشووی ئەڵمانیا، دەستخۆشی لە کۆمەڵگەی مەدەنی کرد بۆ "بەشداری بەهێز و گرنگیان لە پرۆسەکەدا، کە دەبێتە هۆی بەهێزکردنی پرۆسەی پێداچوونەوەی خولیی گشتگیر".

حەیدەر عەوادی، بەرپرسی هاوپەیمانی ئینسان بۆ مافەکانی مرۆڤ کە ڕێکخراوێکی کۆمەڵگەی مەدەنی عیراقییە، وتی "کۆبوونەوەی ئەمڕۆ وایکرد باوەڕ و متمانە بە پرۆسەی پێداچوونەوەی خولیی گشتگیر بکەین. ڕێکخراوەکانی کۆمەڵگەی مەدەنی بەشداری دەستپێشخەرییەکی تۆکمەیان کردووە لەگەڵ کۆمەڵگەی نێودەوڵەتی. هیوادارین ڕاسپاردە گرنگەکانی ئێمە بەهەند وەربگیرێت لەلایەن وڵاتە ئەندامەکان لە ژنێف لە مانگی تشرینی دووەمدا."

خاتو دانیال بێڵ، بەرپرسی باڵای مافی مرۆڤ لە یونامی، جەختی لەسەر گرنگیی گفتوگۆی پێشوەختەی پێداچوونەوەی خولیی گشتگیر کردەوە و وتی: "گفتوگۆی ئەمڕۆ نیشاندەرێکە بۆ پابەندیی هەمەلایەنە بۆ بەهەند وەرگرتنی ئەو بابەتانەی کە ڕێکخراوەکانی کۆمەلگەی مەدەنی عیراقی دەستنیشانیان کردووە و بە گرنگییان زانیوە بە تایبەتی مافی کەمینەکان و ئافرەتان و منداڵان ، مافی مرۆڤ و بەڕێوەبردنی دەستەی دادپەروەریی."

Photo album: https://www.flickr.com/photos/uniraq/albums/72157710823571951

© 2019 United Nations Iraq. هەموو مافەکانى پارێزراوە.